સાધારણત: આપણે આનંદદાયી બાબતોને માણતા હોઈએ છીએ અને અણગમતી બાબતોને નકારતા હોઈએ છીએ, પણ બંને બાબતો જીવનને ઘડે છે, એ આપણે ભૂલી જઈએ છીએ. સર્જનહારે સૃષ્ટિમાં કેટલાં બધાં વૈવિધ્યો સજર્યાં છે! ‘જૂજવે રૂપે અનંત ભાસે’ બધી પરિસ્થિતિઓમાં માણવા જેવું, સમજવા જેવું, કંઈક શીખવા જેવું કંઈક હોય છે. તેથી આ મળે કે તે મળે – તેમ નહીં પણ જે કાંઈ મળે તે બધું જ ઈશ્વરના વરદાનરૂપ જ છે એ જો અનુભવી શકીએ તો આનંદનો કેટલો વિશાળ પ્રદેશ ખુલ્લો થઈ જાય ! અને તેથી બધું માણવું અને લેશ પણ ઓછાપણું ન લાગવું એટલે જ ‘જે મળ્યું માણ્યું ઘણું.’
