જ્યારે આપણે અમુક વ્યક્તિઓને ઓળખીએ છીએ એવો દાવો કરતાં હોઈએ છીએ ત્યારે શું ખરેખર આપણે તે વ્યક્તિને ઓળખતાં હોઈએ છીએ? આ બહુ જ ઊંડો વિચાર માંગી લેતો સવાલ છે. ખરેખર આપણે તો જીવનના અમુક તબક્કાના પરસ્પર પરિચયને ઓળખનું નામ આપી દીધું હોય છે. મનુષ્ય સદીઓથી આ પૃથ્વી ઉપર અસ્તિત્વમાં છે અને લાખો વર્ષોનાં અનુભવના પાકરૂપે આજનું માનવજીવન આકાર પામ્યું છે. દરેક માનવજીવનની અનેક ઓળખ, સ્વભાવ, મુશ્કેલીઓ, ખુબીઓ, ખામીઓ અને ઉકેલો હોય છે. ભારતીય દર્શનશાસ્ત્રે માનવજીવનની આ સંકુલતાને જોવાની, ઓળખવાની અને સમજવાની અનોખી દૃષ્ટિ આપણને પૂરી પાડી છે, જે આ પુસ્તકમાં સરળ ભાષામાં સમજાવવામાં આવી છે.
