Kahoo Ri Kathi Dhara Rajasthani Novel

आथूणै राजस्थान रै मालांणी हलकै में बीसवीं सदी रै दूजै दसक में काहू खैड़ै रै आम किसान परिवार में जलम्यौ कथानायक बन्नाराम आपरी जिनगाणी रा सरूआती बरसां में कीं अैड़ा अणचींता अर अबखा हालात मांय बरसां तांई जूंझतौ रह्यौ के उणरौ अंतस अर अणभव-संसार आपरै परिवेस रा आम लोगां सूं घणौ न्यारौ अर खुद सारू ई अेक अबखी आडी ज्यूं बणग्यौ। बीसवीं सदी रै मझ में आजादी मिळण रै उपरांत ई इण काहू री काठी धरा रा करसां नै जिण भांत रा जागीरी जुलम भोगणा पड्या, उण वेळा में वौ कथानायक हाड़-तोड़ मजूरी अर खेती-बाड़ी सूं तौ जुड़्यौ रह्यौ ई, वौ हलकै रा लोगां में मानवी अधिकारां बाबत जन-जाग्रती पैदा करण रै जतन में ई बरोबर अबखतो रह्यौ। छिनवै रौ दुरभख काळ पड़ग्यौ तौ उणनै मजूरी वास्तै मीरपुर खास जावणौ पड्यौ। वठै सूं पाछौ आयौ तौ जोधपुर रियासत री फौज में नौकरी करणी पड़ी। उणी फौज रै सिपाही रै रूप में उणनै दूजै महाजुद्ध में अंग्रेजी फौज रै साथै अफ्रीका अर यूरोप रा केई देसां में अबखा दिन गुजारणा पड़़्या, आपरै इटली प्रवास में उण इतालवी भासा तकात सीख लीवी। उणी दौर में उण साम्राज्यावादी जुद्ध री असलियत नै जांणी-समझी अर इटली रै अेक मौजीज पत्रकार सूं आजादी अर लोकतंत्र रौ असली अरथ अर मोल समझ्यौ।